مصر مهددة بالدخول في حالة حرب وعداءات مسلحة تهدد المنطقة الافريقية والشرق الاوسط كله
طب أيه اللي حصل بالظبط؟!.. خليني أحكيلك، ونحلل الموقف مع بعض على كوباية الشاي بالنعناع المعتادة ❤☕
بص يا عم..
اللي حصل يا هو إن حسب صور الأقمار الصناعية إمبارح، ف إثيوبيا أوقفت عبور المياه من أعلى الممر الأوسط بتاع سد النهضة، وحصرت العبور بتاعها في البوابتين العلويتين فقط.. وده طبعًا معناه إنهم بدأوا في تجفيف الممر الأوسط تمهيدًا لإنهم يبدأوا في رمي وصب الخرسانة عشان يعلوا الممر والسد كله بالتالي لإرتفاع حوالي 595 متر فوق سطح البحر.. يعني ناويين يزودوا ارتفاع السد حوالي 30 متر كمان فوق ارتفاعه الحالي..
وده معناه أيه أو فايدته أيه؟
فايدته هو إنهم يحضروا السد لإستقبال وتخزين حوالي 18 مليار متر مكعب من مياه نهر النيل، تمهيدًا للملء الثاني لسد النهضة اللي هيبدأ في شهر 7 اللي جاي..
الصورة اللي أظهرت الكارثة دي اتكلم عنها وعرضها الأستاذ الدكتور عباس شراقي خبير الموارد المائية بجامعة القاهرة، وهتلاقيها تحت في أول كومنت 👇 وبناءً عليها، فبردو الدكتور شراقي صرح بإن كمية الخرسانة المطلوبة للوصول للمستوى ده هي حوالي 450 ألف متر مكعب.. والكمية دي يمكن صبها في حوالي شهر من دلوقتي، في حالة إنهم هيشتغلوا عليها طول اليوم 24 ساعة.. يعني بالفعل هتخلص قبل المعاد بتاع بدء الملء الثاني اللي صرح به رئيس الوزراء الإثيوبي آبي أحمد، ضاربًا بكل القواعد والقوانين الدولية والإتفاقات والمصالح المشتركة لدول المصب عرض الحائط..
طيب ده معناه أيه؟!
الجانب الإثيوبي عمال داير يقول تصريحات في كل حتة في العالم، بتقول إن المخارج المنخفضة بتاعت السد، اللي هي بتسمح بمرور المياه دلوقتي، هتكون كافية لتمرير الكمية اللي عايزها مصر والسودان.. وده في الواقع كذبة كبيرة جدًا هما عمالين يروجولها بالآلة الإعلامية بتاعتهم.. عشان حسب بيان لسه خارج من وزارة الري من ساعات قليلة، فقدرة المخرجين دول على تمرير المياه لا تتجاوز الـ 50 مليون متر مكعب في اليوم.. والقدرة دي قليلة جدًا وغير كافية بأي حال من الأحوال لتلبية احتياجات دول المصب.. وكمان هي غير مكافئة لمتوسط التصريفات بتاعت نهر النيل الأزرق اللي بيمر بمصر والسودان..
وفوق كل ده كمان، وحسب تصريحات وزارة الري المصرية بردو، تنفيذ عملية الملء الثاني ف موعدها المقرر شهر 7 ده، بالطريقة اللي ماشي فيها الجانب الإثيوبي حاليًا، هتأثر بشكل كبير على نظام النهر، عشان الوسيلة الوحيدة للتحكم في كميات المياه اللي بيتم تصريفها من السد وقتها هتكون المخرجين المنخفضين الصغيرين دول.. وده معناه إن الوضع هيتعقد بما لا يقاس لما عملية الملء الفعلية تبدأ، ويتم احتجاز المياه ورا السد.. الأضرار على مصر والسودان في حالة إن الفيضان السنة دي كان متوسط هتكون كبيرة.. وفي حالة إن الفيضان كان ضعيف أو منخفض، فالأضرار هتكون كارثية!!
طب وبعدين؟!.. رد الحكومة المصرية على الموضوع ده أيه؟!
الحكومة المصرية حاليًا متمثلة في وزير الخارجية سامح شكري، بتعمل جولة من الزيارات لدول إفريقية معينة هي كينيا وجزر القُمُر وجنوب إفريقيا والكونغو الديمقراطية والسنغال وتونس.. وطبعًا حد هيسألني أيه فايدة الجولة دي.. أنا هقولك..
الفايدة يا سيدي هي إن مصر حاليًا بتحاول تاخد خطوة في إتجاه شرح الموقف المصري والسوداني لجميع دول إفريقيا المؤثرة على القضية دي، وده كتمهيد لإنهم يعملوا تدويل عالمي للقضية، ويعرضوها على دول العالم كله، عشان يكسبوا تأييد للموقف المصري بالنسبة لقضية سد النهضة.. عشان نحارب الإعلام المضاد بتاع إثيوبيا اللي داير بيقول للعالم كله إن مصر والسودان هما اللي بيتفاوضوا بسوء نية، وإننا إحنا اللي مش راضيين نوصل لإتفاق!!..
عايز أقولك إن الجولة دي بدأت برسالة خاصة سلمها وزير الخارجية سامح شكري، للرئيس الكيني أوهورو كينياتا، فيها كل التفاصيل الخاصة بقضية سد النهضة والموقف المصري منها، والضرر اللي هتسببه على مصر والسودان.. وده ليه؟!.. عشان كينيا هي عضو غير دائم في مجلس الأمن بالأمم المتحدة، وممثل عن قارة إفريقيا في المجلس.. يعني موقفهم من القضية مهم إنه يكون شفاف، ولازم يبقوا عارفين الحقائق كاملة، عشان لو حصل أي عمل عسكري مستقبلًا، محدش يرجع يعيط..
الحقيقة ان اختيار الدول بتاعت الزيارة دي مهم واستراتيجي.. عشان أولًا هي فيها دول أعضاء في جامعة الدول العربية زي جزر القمر وتونس، ودول ليها وزنها في الإتحاد الإفريقي زي الكونغو الديمقراطية اللي هي الرئيسة الحالية للاتحاد، وكينيا اللي هي في مجلس الأمن زي ما قلنا.. وتونس خلي بالك هي الدولة العربية الوحيدة العضوة في مجلس الأمن.. يعني مهم إننا نديها كل المعلومات الخاصة بتطورات قضية سد النهضة عشان تقدر تتحرك في القضية دي بالنيابة عننا، بما إن مصر بعتت خطاب لرئيس مجلس الأمن لما فشلت مفاوضات كينشاسا من أسبوعين تقريبًا.. المفاوضات اللي كانوا مسميينها (مفاوضات الفرصة الأخيرة).. وطبعًا الإسم له دلالة زي ما أنت شايف..
أهداف الجولة دي هي اهداف سياسية في المقام الأول.. اللي عايزينه باختصار هو إننا نحاول نقرب وجهات النظر بين مصر ودول حوض النيل، عشان نعمل معاهم موقف سياسي حاسم بره خارج الإتحاد الإفريقي اللي إثيوبيا واضح جدًا إنها مسيطرة عليه حاليًا، وبتستعمله في إنها تأكد على حقها في التشغيل والتصرف الفردي بدون اتفاق، وبتحاول تغير النظرة العامة لنهر النيل من إنه نهر دولي عابر للحدود، لإنه نهر إثيوبي خاص.. يعني باختصار، إحنا بنحاول نعمل توازن دبلوماسي مع التحركات الإثيوبية اللي بتلف العالم بردو إعلاميًا وبتحاول تقولهم عكس الحقيقة تمامًا.. وده بهدف تدويل القضية، وإيصال أبعادها الحقيقية للعالم كله.. عشان بردو محدش يتكلم أو يفتح بقه لو مصر قررت استعمال الحل العسكري، اللي يوم بعد يوم وساعة ورا التانية بيبان أكتر إنه الحل الوحيد والأخير..
في حرب إعلامية وسياسية وجودية بتدور حاليًا ما بين مصر وإثيوبيا في كافة المحافل الدولية، وعلى مرأى ومسمع من العالم كله.. وفي وسط ما أنت قاعد مشغول بمسلسلات رمضان، الإثيوبيين على الجانب الأخر بيوجهوا الرأي العام الغربي لتبني وجهة نظرهم هما في إن النيل بتاعهم وبينبع من أرضهم، وإنهم ليهم كل الحق في إنهم يستعملوه زي ما يحبوا بغض النظر عن أي دولة تانية.. بيحاولوا يوروا العالم إن دي مسألة سيادة إثيوبية، وغير مسموح لأي دولة تانية بالتدخل أو التحكم فيها.. وده على الرغم من مخالفة ده لكل الإتفاقات والقوانين والأعراف الدولية، بما فيها إتفاقية إعلان المباديء اللي وقع عليها الرئيس السيسي سنة 2015، واللي نصت بوضوح على عدم اتخاذ أي قرار أحادي في مسألة سد النهضة..
يوم الأحد اللي فات، وزير الموارد المائية المصري محمد عبد العاطي، قال إن القاهرة اقترحت "15 سيناريو مختلفًا لملء وتشغيل سد النهضة" على مدار السنين اللي فاتت، على نحو "يحقق المتطلبات الإثيوبية وبدون إحداث ضرر ملموس على دولتي المصب"، لكن بردو الجانب الإثيوبي "رفض جميع هذه المقترحات".. وده معناه شيء واحد بس.. إن إثيوبيا عايزة ومصممة على دفع مصر نحو خيار الحرب بكل ما فيه من صعوبات وكوارث سياسية واقتصادية أكيدة على البلدين.. وده بيخليك تتسائل.. أيه مصلحة إثيوبيا في ده؟!
طب إثيوبيا و وراها تمويل إسرائيلي، وحتى السياسة اللي بيلعبوها هي نفس سياسة (ضربني وبكى وسبقنى واشتكى) الصهيونية اللي كلنا عارفينها.. الغريب والغير مفهوم هو إستمرار دول عربية شقيقة زي الإمارات مثلًا في دعم إثيوبيا سياسيًا واقتصاديًا في مسألة وجودية زي سد النهضة!!.. مسألة حياة أو موت حرفيًا، مينفعش فيها الحياد ولا (المياعة) بالبلدي.. هل أبو ظبي خايفة من الدور المتنامي للسياسة المصرية مؤخرًا، وحابة تحجم الدور المصري أكتر عشان تقوم هي بدور قيادي في الشرق الأوسط بدلًا عن مصر؟!.. هل التطبيع الإماراتي الإسرائيلي المتزايد في الشهور اللي فاتت له علاقة بده؟!.. وعن التطبيع، وصور التعاون الإماراتي الإسرائيلي الحالي حدث ولا حرج.. الموضوع ده محتاجله مقال لوحده..
فهل مصر بعد كل ده محتاجة تعيد تقييم علاقتها السياسية بالإمارات، في ضوء التغيرات الجديدة الغير مفهومة دي؟!.. هل إحنا محتاجين نتعامل مع الإمارات باعتبارها دولة متآمرة على مصر في الوقت الحالي؟!.. والموضوع هنا مالوش علاقة بمجرد النظام الحاكم في مصر، لإن الموضوع أكبر وأخطر من كده.. إحنا بنتكلم عن شعبين كاملين بيواجهوا أكبر خطر في تاريخهم، على مر أكتر من 7 آلاف سنة كاملين!!
الحقيقة إن التاريخ علمنا كتير جدًا.. علمنا قد أيه الأطماع الإثيوبية من فجر التاريخ بتتوجه بالعداوة نحو مصر، وإن عندهم رغبة تاريخية شديدة في كل العصور والأزمنة تقريبًا بقطع المياه عننا.. عرفنا كل حاجة عن سفر أشعياء وتمنيات ونبوءات الصهاينة بجفاف مصر وخرابها عشان يقدروا يرجعوا لاحتلالها ونهبها مرة تانية.. عرفنا وقرينا الكلام ده كله في التوراه، وشفناه رأي العين في سياستهم من ساعة ما بدأ بناء سد النهضة في 2011 باكتتاب اسرائيلي مباشر، ودعم منهم للحبشة أو إثيوبيا حاليًا، في السعي نحو خراب الدولة المصرية..
على سبيل المثال، الراهب جور دانوس سنة 1330 ميلادية، ذكر إن سلطان مصر كان بيدفع إتاوة لملك الحبشة عشان يسمح بجريان النيل إلى مصر.. وف حوالي نفس الفترة قال المؤرخ ماريجونوللي إن في استطاعة الإثيوبيين أو الأحباش قطع ماء النيل عن مصر، وساعتها مصر هتتعرض للهلاك.. كمان سنة 1384 ميلادية، قال المؤرخ سيمون سيجولي إنه لو ملك الحبشة فتح مجرى نهر معين في بلده، فإنه هيغرق القاهرة والإسكندرية وجميع أراضي مصر.. الكلام ده اتنشر رسميًا في ورقة بحثية بعنوان:
دبلوماسية الإمبريالية The Diplomacy of Imperialism لويليام لانجار William Langar، وممكن تدوروا عليها بنفسكم..
ده غير إن كمان في فترات مختلفة من التاريخ المصري هدد فعلا ملوك الحبشة بقطع نهر النيل عن مصر.. زي زرء يعقوب سنة 874 هجرية/ 1443 ميلادية، شهر نوفمبر، بعت رسالة قال فيها:
"وليس يخفى عليكم وعلى سلطانكم أن بحر النيل ينجرُّ إليكم من بلادنا، ولنا الاستطاعة أن نمنع الزيادة التي تُروى بها بلادكم عن المشي إليكم؛ لأن لنا بلادًا نفتح لها أماكن فوقانية يتصرَّف فيها إلى أماكن أخرى قبل أن تجيء إليكم"
والكلام ده موجود في كتاب السخاوي : التبر المسبوك في ذيل السلوك، تحقيق نجوى كامل ولبيبة إبراهيم، في دار الكتب والوثائق القومية..
غير قبلها رسالة من ملك الحبشة جبره مصقل للسلطان الناصر محمد بن قلاوون واللي جاء فيها "نيل مصر الذي به قوام أمرها وصلاح أحوال ساكنيها مجراه من بلادي، وأنا أسده".. ودي موجودة في كتاب النويري: نهاية الأرب في فنون الأدب، اللي موجود في دار الكتب والوثائق القومية بردو، بطبعته الأولى..
إصرار بعض الدول العربية على دعم السياسة الإثيوبية في مسألة سد النهضة بعد كل ده هو شيء مؤلم جدًا وغير متوقع، لإننا المفروض دم واحد وشعب واحد.. ومصر عمرها ما كان عندها مشكلة إنها تقدم دماء أبناءها فداءً للعرب أجمعين، ودومًا كنا الدرع الحامي للعروبة كلها.. لكن اللي بنشوفه حاليًا هو شيء فعلًا يوجع القلب..
ضرب السد حاليًا أصبح مسألة وجودية لا يصح فيها التخاذل أو التأخير.. وأي تهاون أو استهانة بها سيذكره التاريخ دومًا بالخذلان والهوان.. إحنا صبرنا كتير جدًا طوال أكتر من 10 سنين من المفاوضات بحسن نية مع إثيوبيا، وحاولنا كتير نتعامل بحسن نية، وللأسف كل ده اتفهم على إنه ضعف.. وهو للأسف أبعد ما يكون عن ذلك.. عشان مصر عمرها ما كانت دولة معتدية أو مغتصبة، بل بالعكس.. إحنا بندعم حقوق كل الدول في النهضة والتنمية.. بس مش على حساب حياة شعوبنا إحنا..
الحرب آه هتبقى صعبة، وآه هتسبب تردي إقتصادي غير مسبوق، وهتأثر علينا كشعب وعلى مستوى المعيشة عندنا، وهتتعبنا أكتر من ما إحنا تعبانين بكتير.. بس المصريين مستعدين يستحملوا.. عشان لأول مرة منذ ثورة يناير تقريبًا، مصر كلها متحدة وعلى قلب رجل واحد واقفين ورا قرار ضرب سد النهضة..
السد ده لو اتبنى هيخلي مصر طول عمرها دولة راكعة وضعيفة وتحت رحمة إثيوبيا تقفل علينا الحنفية في أي وقت.. وكل الرؤساء المصريين منذ فجر التاريخ هددوا إثيوبيا في حالة حدوث ده، بصرف النظر عن أي مواقف أو عواقب دولية..
ومتهيألي لو كده كده هنموت.. يبقى نموت بكرامتنا أحسن..
***
في النهاية، لو التحليل السياسي ده عجبك، ياريت تعمل منشن لصحابك وحبايبك يقرأوه معاك، ومتنساش تعمل شير عشان تنشر المحتوى لناس أكتر.. ده بيساعدني على الكتابة والإنتشار، وهو الدعم اللي ممكن تقدمه للمجهود اللي ببذله في كتابة المقالات دي..
ودي بعض المصادر اللي استعنت بيها في الموضوع:
https://www.bloomberg.com/.../ethiopia-asks-un-to-urge...
https://www.bbc.com/arabic/inthepress-56816948
https://www.bbc.com/arabic/middleeast-56800412
https://www.reuters.com/.../us-ethiopia-dam-egypt-sudan...
شكرًا ❤
تعليقات
إرسال تعليق